Ardon Jashari, ende pa marrëveshje me Milanin – finalizimi varet nga transferimi i Theo Hernandez
Mesfushori me origjinë shqiptare, Ardon Jashari, ende nuk ka arritur një marrëveshje përfundimtare me Milanin, pavarësisht dëshirës së tij të qartë për t’u transferuar te gjiganti italian. Sipas “Tuttosport”, Jashari tashmë i ka komunikuar Club Brugge se preferon kalimin te kuqezinjtë, ndërsa edhe vetë Milani ka bërë hapa përpara drejt plotësimit të kërkesave të klubit belg.
Megjithatë, marrëveshja është ende pezull për shkak të disa çështjeve të hapura që po pengojnë merkato-n e Milanit. Një nga to është transferimi i Theo Hernandez drejt Al Hilal. Edhe pse marrëveshja mes palëve është arritur në të gjitha aspektet, finalizimi është shtyrë për shkak të angazhimeve të klubit saudit në Kupën e Botës për Klube. Milani dëshiron të përmbyllë më parë largimin e francezit, për të përshpejtuar më pas afrimin e Jasharit.
Gjithashtu, situata e dy lojtarëve të tjerë ka ndikuar në ngadalësimin e operacioneve. Malik Thiaw nuk është i bindur për transferimin te Como, ndërsa Alvaro Morata ka dhënë miratimin për të kaluar te Milani, por Galatasaray nuk po e lehtëson zgjidhjen e huazimit të tij.
Megjithatë, Milani pritet të rikthehet me një ofertë të përmirësuar për Jasharin: 33 milionë euro plus 5 milionë në formë bonusesh, shifër që mund të bindë përfundimisht Club Brugge për të lejuar largimin e mesfushorit.
Ndërkohë, edhe Juventusi po lëviz për të përforcuar repartin e mesfushës. Skuadra e drejtuar nga Massimiliano Allegri ka siguruar shërbimet e Samuele Ricci nga Torino për 23 milionë euro plus 2 milionë bonuse, ndërsa Luka Modric do të bashkohet me bardhezinjtë pasi të përfundojë angazhimin me Real Madridin në Kupën e Botës për Klube.
Javët e ardhshme pritet të jenë vendimtare për të ardhmen e Ardon Jasharit dhe lëvizjet në mesfushën kuqezi.
